ඔබේ ලෝකයේ මැවුම් කරු ඔබේ නිර්ණායකයි..

ඔබ කෙනෙකුගේ වටිනාකම මනින
නිර්ණායක මොනවාද..?

ඔහු උපන් ආගම හෝ ජාතිය මත
ඔබ ඔහු පිළිබඳව තීරණ ගන්නවාද?

දෙව්දත් තෙර බුදුන් වහන්සේගේ
උපතින් ළඟම ඥාති සහෝදරයෙක්.
ගිහි කල බිරිඳගේ සොහොයුරා.
ජනප්‍රිය උපසපන් භික්ෂුවක්.
අජාසත් රජුගේ සමීප හිතවතෙක්..
දෙව්දත්  වටිනා කෙනෙක්ද?

ක්‍රිස්තුන් වහන්සේ ගෝලයන්
දොළොස් දෙනෙක් තෝරාගත්තා.
ඔවුන් අවසානය තෙක්ම රැඳී සිටියා.
උන්වහන්සේ පාවා දුන් ජුදාස්
උන්වහන්සේගේම ගෝලයෙක්.
ජුදාස්   වටිනා කෙනෙක්ද?

මෙවැනි උදාහරණ ඔබේ ජීවිතයෙන්
කොතරම් සොයාගත හැකිද?

සත්හැවිරිදි නිග්‍රෝධ සාමණේරයන් වහන්සේ මගින්
බුදු දහමට සම්බන්ධ වූ ධර්මාශෝක රජු සමග
මුලු දඹදිව එක සේසත් කළ
චණ්ඩාශෝක නම් මැරයා සසඳන විට
ඔබේ නිර්ණායක අනුව
ඔබ තෝරාගන්නේ කවුද?

ඔබ වටා සිටින ඔබට වටිනා පිරිස
තෝරාගැනීමේදී ඔබ උපයෝගී කරගත්
ඔබේ නිර්ණායක මොනවාද?

ඔහුගේ හෝ ඇයගේ මන බඳින රුව..?
ආගම, ජාතිය, රැකියාව,...?
ආයතනය්, වාහනය, නිවස..?
අධ්‍යාපන සහතික, සමාජයේ තනතුරු.. ?
නෑ හිතමිතුරන්ගේ තරාතිරම...?
අතීතයේ කළ කී දේ...?
අනාගතයේ කරනු ඇතැයි සිතන දේ...?
ඔබට සලකන ආකාරය...
ඔබව අගය කරන ආකාරය...

කිසිවෙකුගේ ජීවිතයක
සැබෑ වටිනාකම නිර්ණය කිරීමේදී
මේ කිසිදු නිර්ණායකයක් නිවැරදිද?

පන්සිල් රකින කෙනෙක්
උපතින් මිනීකන ගෝත්‍රිකයෙකු වීම
ඔහු සමීපව ඇසුරු කරන්නට
ඔබට ගැටළුවක්ද?

අවම වශයෙන්
පස් පවින්වත් වැළකීමට තරම්
ආත්ම දමනයකින් තොර කෙනෙක්
ඔහුගේ චරිතය වසාගෙන ඇති
අනෙක් පිරුවට ඉක්මවා දකින්නට
ඔබට නොහැකිවන්නේ ඇයි.?

ඔබේ මනස සකස්වී ඇත්තේ
ස්වාධීන මිනිසෙකු ලෙසද?

නැත්නම්
ලොකු කල්ලියක් සොයාගෙන
ඒ කල්ලියේ බලයෙන් කුල්මත්වෙමින්
කල්ලිය සමග ගමන් කරන
කල්ලිවාදී චින්තනයකින්ද?

බාහිර ලෝකය අගය කරන දේ
ඔවුන් අනුව අගය කරන විට
ඔබ හිස්මුදුනේ තබාගෙන ඉන්නා දේ
ඔවුන්ට සාපෙක්ෂව ඔවුන්ට වටිනා දේ නොවේද?

උපතින් මිනීකන ගෝත්‍රිකයෙක් වුවත්
ශීලයෙන් සමාධියෙන් හා
ප්‍රඥාවෙන් යුතු කෙනෙක් නම් ඔහු අගය කරන්නට
ඔහු සමීපව ඇසුරු කරන්නට තරම්
ඔබ ස්වාධීනද?

ගෝත්‍රික හැසිරීම්වලින් යුතු නම්
දෙමාපියන් සොයුරු සොයුරියන් නෑසියන් පවා
ඈත්කර තබන්නට තරම්
ඔබ පවිත්‍රද?

ඔබ වටිනාකම් මනින නිර්ණායක අනුවම
ඔබ රැස්කරගන්නා සම්පත්ද නිර්ණය වන බව
ඔබට වැටහෙනවාද?

ඔබ වටිනාකම් මනින නිර්ණායක අනුවම
ඔබ රැස්කරගෙන ඇති දේත්..
ඔබ වටා සිටින පිරිසත්
ඔබේ ජය පරාජයත්,
ඔබේ සාර්ථකත්වය අසාර්ථකත්වයත් ඇතුළු
මුළු ජීවිතයම තීරණය වෙයි.

ඔබ බාහිර ලෝකයේ වටිනාකම් මනින නිර්ණායක අනුව
ඔබේ ඇතුළාන්තය නිර්මාණය වෙයි..
ඔබේ ඇතුළාන්තය අනුව බාහිර ලෝකය
නිර්මාණය වෙයි..

ඔබේ ලෝකය ඔබේ නිර්ණායක අනුව
ඔබ විසින්ම සකස් කරගත් ඔබේම නිර්මාණයයි....
ඔබේ ලෝකය වෙනස් වෙන්නට නම්
ඔබේ නිර්ණායක වෙනස් කරගන්න.