.
"ඇසු පිරූ තැන් නැති පුහුදුන් තෙමේ දුක්වේදනාවෙන් පහස්නා ලද්දේ කම්සුව පිළිගනී. ඒ කවර හෙයින යත්: කම්සුවය හැර දුක්වේදනාවේ දුරුකිරීමක් නො දනී."
බුදුන් වහන්සේ මේ කියන දේ තුළ
ගැබ්වෙන සත්‍යය පැහැදිළියි.
දුක් වේදනා විඳින පුද්ගලයා
ඒ මානසික බරෙන් නිදහස් වෙන්න
කාමච්ඡන්දයෙන් යම් සුවයක් සොයනවා.
කෑමෙන් බීමෙන් වගේම මත් පැනෙනුත්
ඔහු කරන්නෙ දුකෙන් පළා යාමක්.
කෙනෙක් සතුට සොයා යන්නෙ ඇයි?
සතුට අවශ්‍ය නිසාද?
දුකෙන් පළා යන්නද?
බිරිඳගේ කන්දොස්කිරියාව අහලා
අල්මාරියෙන් වීදුරුවක් දෙකක් දාගන්නෙ..
නැත්නම් හන්දියට ගිහින් රත් කරගන්නෙ
සතුට අවශ්‍ය නිසාද?
ඔහු එන්නෙ ආයුධ සන්නද්ධ වෙලා.
ඉන් පස්සෙ ඔහුට නැමිලා
කීකරුව ඉන්න බිරිඳ සූදානම්.
සමහර බිරින්දෑ වරු බීල වගේ
බීල ආපු කෙනා සමග දබර කරගන්නවා.
සමහර විට ඔවුන් ඒකටත් ඇබ්බැහි වෙලා
ඒ විදියට හෝ සම්බන්ධ වීම
රස විඳිනවා ඇති.
තව කෙනෙකුට...
කතා කරන්න නම් සෙට් වෙන්න ඕන...
බොන්න ඕන.
කියන්නෙ මොනවද බලන්නෙ නැතුව
කතා කරන්න නිදහස ඕන.
මේ වගේ නොයෙක් හේතු මත
මත්පැන් බොන පුද්ගලයන් මත් වෙනවා.
මත් වෙලා පත්වෙන මෝහය සුවයක්.
ඉංග්‍රීසි කියමනක් තියනවා...
" Ignorance is bliss " කියලා.
"නොදන්නා කම පරමානන්දයයි"
ignore කරනවා කියන්නෙ
නොසලකා හරිනවා කියන එකයි.
ඒ සුවය තමයි මත්පැනෙන් ලබා දෙන්නෙ.
හැමකෙනෙක්ම ඉන්නෙ යම් මෝහයක.
ඒ මෝහයත් විනිවිද දුක කාන්දු වෙනකොට
ජීවිතේ රසවත් බව ටිකෙන් ටික හිඳෙනකොට
ෆැෂන් එකක් විදියට මුලදි බොන කෙනෙක්
බොන්න නැත්නම් විෂාදයට පත්වෙන තරම්
ඇබ්බැහි වෙන්න පුලුවන්.
ඇබ්බැහි වුණාට පස්සෙ සීමාව දන්නෙ නෑ.
ඒ අසීමාන්තික මෝහය.....
.
#athulasiriwardhane
