20130119

යකා යකැදුරාට තොවිල් කිරීම


===================================
Facebook සමූහයක
පැටලීමක් ඇතිකර ගන්නට
වෙර දරන වෑයමක පෙර නිමිති දැක
ඒ අරබයා ලියූ සරල සටහනකි.
මෙහි පළ කරන්නේ හුදෙක්ම
විනෝදය සඳහාය.
===================================



මේ ඇමතුම
මෙන්ඩිස් සහ තිරෙන් පිටුපස සිටින
පැරණි යකැදුරන් පිරිසකටය.
"අන් අයට අදාළ නොවේ."
--------------------------------------------------

ජීවිතය රෝසමල් යහනාවක් නොවන හෙයින්ම
කටු යහනක වුවද රෝසමල් යහනාවක මෙන්
සුවසේ සැතපෙන්නට අප පුරුදු විය යුතුය.

ජීවිතය ඉඳහිට පාහේ
තොවිල් පළක් බවටද
පරිවර්තනය වන්නේ
අප තොවිල් නැටීමටද
තොවිල් බැලීමටද
කැමති නිසාය.

යකාට බය යකැදුරන්ද
යකැදුරන්ට බය යකුන්ද
එකිනෙකා නොගැටීමට
ප්‍රවේශම් වෙති.

තොවිලය වඩාත් සිත්ගන්නේ
තමන් යකැදුරන් යයි සිතන අය
තමන්ට යකුන් මෙන් පෙනෙන අයට එරෙහිව
පන්දම අතට ගත් විටය.

මා මෙහි සිටි කෙටි කාලය තුල
යකැදුරන් යයි සිතන අය
තමන්ට යකුන් මෙන් පෙනෙන අය
පළවා හරින්නට
තමන්ගේ ශක්ති පමණින්
මෙහි තොවිල් නටති.

රෑ පුරා මොන කරණම්,
බඩපිණුම් ගැසුවත්
පාන්දර එළිය වැටෙන විට
තොවිලය හමාර වෙයි.
නරඹන්නෝ නිදිගැට කඩමින්
ගෙවල් බලා යති.

තොවිල් නටන්නන්ට වඩා
ඉන් තෘප්තියක් ලබන්නේ
තොවිල් බලන පිරිසයි.
තවත් තොවිලයක් යැයි
මේ දැනුත්
ඔවුන් ඇස් දල්වාගෙන
බලා සිටිනු ඇත.

මේ විවරණය
තොවිල් නටා, නරඹා හුරු
සහෘදයන් සඳහාය.

අද මේ නටන්නට සූදානම්
වන්නේ සොකරි නැටුමකි.
කවර පන්නයට
සොකරි නැටිය යුතුදැයි
මා මින් පෙර සිතා නැත.
මට මේ තවත් අලුත් අත්දැකීමකි.

සොකරි නටන්නට
ඊට දක්ෂකම් ඇති
සොකරි නටන්නට හුරු
යකැදුරෙක් ලැබිය යුතුය.
මින් පෙරත් මුලු රැයක්ම ගත කළද
මා හරි හරියට නැටුවේ නැත.
අත්වැල් ඇල්ලුවා පමණෙකි.
එද නරඹන්නන් සඳහාය.

මේ නැටුම නටන්නට
මමද බලා සිටිමි.

මෙය මගේ ආරම්භක සුරලයි.

සොකරි නැටුම නරඹන්නන්
ඉතාම කැමති නැටුමකි.
දෙදෙනෙක් සොකරි නටන විට
ඔවුන් එකිනෙකාට හිනැහෙති.
නරඹන්නෝ ඊටත් වඩා හිනැහෙති.
වඩාත් කුල්මත්වන නරඹන්නෝ
පිටියට පැන අත්වැල් අල්ලති.

කොතරම් රස වින්දත්
තොවිල් නටන අය තරම්
බලා සිටින්නන් ඉගෙන ගන්නේ නැත.
තොවිල් නටන අය
වඩාත් හොඳින් තොවිල් නටන්නට
ඉගෙන ගනිති.
නැත්නම් තොවිල් නැටීම
අත්හැර දමති.

සාමාන්‍යයෙන්
යකැදුරා සහ නරඹන්නන් ලබන
කටුක වින්දනය
හැම යකාම විඳින්නේ නැත.
බොහෝ මුදු මොළොක් යකුන්
තොවිලය අතරමග
ආතුරයා වී පලායයි.
තොවිලය දරන්නට බැරිව
පලායන නරඹන්නන්ද ඇත.
එනමුදු, හොඳ රසඥතාවයක් ඇති
ඕනෑම යකෙකුට
හිත හදාගත්තොත්
තමා එළවන්නට කරන
තොවිලයක් වුවද
රස විඳිය හැකිය.
කටුක රසයත් රසයකි.

ආතුරයාත් ලෙඩ නොකර
යකැදුරාටද හානි නොකර
යකුම නටන්නට
යකා ඉගෙන ගත යුතුය.
තොවිලයෙන් නොමිලේ පරල වනවා වෙනුවට
යකැදුරා කැමති ආකාරයට
යකැදුරා දෙන ඇඳුමක් ඇඳගෙන
යකුම ප්‍රගුණ කිරීම
දක්ෂ යක්ෂයාගේ සිරිතය.

මාත් ස්වභාවයෙන්ම
තොවිල් නටන්නට කැමැත්තෙමි.
විවිධ තොවිල් පලවල
විවිධ යකුන්ට ඇඳ
විවිධ තොවිල් නැටුවෙමි.
මතුවටත්
නටන්නට කැමැත්තෙමි.

මා වඩාත් කැමති වන්නේ
යකාගේ චරිතයේ සිට
යකැදුරාගේ චරිතයට මාරුවී
යකැදුරා ආතුරයෙකු කොට
ඔහු තුළ සිටින
යකුන් පළවා හරින්නටය.

නැටූ තොවිල් වලින්
මාද බොහෝ දේ උගත්තෙමි.
නොයෙක් අලුත් බෙර පද මෙන්ම
අලුත් අලුත් පන්නයේ මන්තරද
වයිවාරන්න නැටුම්ද ඉගෙන ගත්තෙමි.
තොවිලයේ වඩාත්ම සුන්දර කොටස
ඉන් ලබන අමිල අධ්‍යාපනයයි.

ඉතින්...
තොවිල් නැටීම හොඳයි.

තොවිල් නටන යකැදුරා
එළවීමට උත්සාහ කළයුත්තේ
සැබෑ යකුන්ය.
යකුන් සමග ඇසුරු කරන අයට
මන්තර පුහුණුව ඉබේම ලැබෙයි.
යකුන් පළවන්නට හැකි
බලගතු මන්තරද ලැබෙයි.

යකුන්ට කියන මන්තර කියා
මිනිසුන් එළවන්නට බැරිය.
මිනිසෙකු එලවන්නට නම්
ඔහුගේ යකා ඇවිස්සිය යුතුය.
යකා ඇවිස්සෙන්නේ නැති
මිනිසුන් යකුන්ට බය නැත.

යක් වෙසින් එන යකැදුරාට
මිනිසුන් සමග කටයුතු කිරීමට
වෙනම භාෂාවක් ඇත.
එහෙයින්
යකාට කියන අපූර්ව මන්තරය
මිනිසාට රසවත් නාද මාලාවකි.

යකා වෙනුවට වෙස් බඳින මිනිසාට
කටුක මිහිරක් දෙන නාද මාලා,
බෙරපද, යකැදුරු නැටුම්, යාතිකා,
අත්වැල් ආදී සියල්ලම ඇතුලුව
මුලු තොවිලයම
සුන්දර අත්දැකීමකි.

තොවිල් නටන්නට පැමිණෙන
යකැදුරු ගුරුන්නාන්සේට
තොවිලය වැරදුණහොත් සිදුවන්නේ
ආතුරයාත් අතහැර
ගෝල පිරිසත් සමග
හූ කියාගෙන පලා යන්නටය.